من تونسيّة الى مشروع عروس سلفي

انحبك تشيخ ...لا نحبك تفنى فيّ و تفوح ريحة تشوشيط راسك و شويان كبدتك, نحبك تتقلى في سرير الشوك  و تشرب ماء البحر كي تعطش و نحبك  ترشق في قلبك ابرة و توشم اسمي بالحرقوس على لحمتك الحية...نحبك تبكي دم و تتنفس دخان, تاكل الحجر و تمشي عالجمر...ذوق محلاه الحبّ المرّ..الحبّ الصّعيب يصنع الرّجال ...و النساء!

شنوّاغلّبت عليك؟ تعّبتك و صعبت عليك؟ ظلامت الدنيا في عينيك و ما لقيتش بيها وين؟ تي يزيك مالتلكوين و ايجا غطس صبعك معايا في تشكيلة متاع ليلة زرقة

موش شاهي؟ قلبك برد و سلّمت؟,

justement, c'etait le but

حبّوك تكلّ و تملّ

مالكرّ و الفرّ

هدّوك؟

دقدقوك؟

 عملو بصوابعك علجيّة؟

و كتفوك بسلاسل السّلفية؟

حكمو فيك وين تمشي ووين تجي ؟

 وقتاش يجوز النّكاح و كيفاش تبسمل وانت ناده عالنبي؟

قالولك تبّع كلامنا و الا مرتك يشاركك فيها الشيطان و رجال البحار و الجنون الي تسري

 تسخايل سهّلوهالك؟ لا ...ركّبوهالك! 
و ركبني بليس!!! حلفتو بالجّاه لا عاد هالمؤسسة نحط فيها ساق

عرس ؟ عرس الذلّ ... عرس النفاق

عملتو بنساكم العار, ملي متملّك بيها لابسها

يقيس في القماش بالصّانتي على ركبتها

,للّي حاططها في تركينة و عامل كازانوفا في غيبتها

,فيق فيق راك زدت من نكبتها

ما كفاش التّاريخ من سنين و هو شادد جرتها

قالّك "لا تحزن" !عورة و مكسورة

في فمّها كلمة مقهورة

لا الحيّ يحب يسمعها لا الموت يحب يحييها

تتحارب مع الزمان و الرجال, وجيعتها بين جواجيها

,لا من يرحم لا من يرفق , الناس الكل طامعة فيها

,هي تونس و هي المرا

,هي الام و هي السماء و هي  الوطاء 

هي

آنا

كتب في 2012 مع التحول الاسلاموي المبارك